السلام عليكم ورحمة الله وبركاته

مساء/ صباح الورد

رح أكتب هذا الموضوع للإستفادة من تجربتي والأخطاء التي وقعت فيها أثناء تصميم وتنفيذ بكجاتي، بثبتها هنا بناءً على طلب الكثير بعد طرحها على ستوري الانستقرام

بتكون في 3 مراحل: مرحلة التصميم، مرحلة التنفيذ، والنهاية هي التوصيات.

أولًا: مرحلة التصميم

أول شي بدأت بمرحلة تصميم الهوية، وكان الاتفاق أن يتم الدفع دفعة مقدمة بنصف المبلغ والمتبقي عند استلام التصميم

كان التصميم يشمله بعض المطبوعات، ( وكانوا متعاونين معاي من ناحية المطبوعات الي ما احتاجها استبدلتها بمطبوعات تناسبني).

انتهى التصميم في وقت قياسي وكانت الفرحة ما تنوصف خصوصًا إن التصميم كان راق لي من أول تصميم ( عطوني هويتين واخترت وحدة).

ودفعت لهم الدفعة المتبقية بعد الانتهاء من التصميم.

وبعدها رحت واخترت أنواع الورق للمطبوعات، ولما استلمت المطبوعات للأسف ماكانت بالجودة المعروضة عندهم.

وبعضهم فيهم شوية تلف، وأعادوا لي الطباعة فقط للتالف.

أما بالنسبة للي جودتهم مو واضحة قالوا لي هذي المشكلة من اللون تبعك إنه شوي غامق وسادة ( وكان عندهم عينة بلون أغمق من الي عندي وسادة وكانت جودة جدًا عالية وواضح).

المهم، خلصت من مرحلة تصميم الهوية، وطلبت منهم تصميم الباكجنق وطلب من الدفع كامل (ودفعت لهم) على أساس الثقة مسبقًا بسرعة الانجاز في تصميم الهوية.

بعدها جلست معاهم جلسة بحيث يعرض علي الأفكار وأعطيهم الشي الي يعجبني والشي الي ما يعجبني.

ومرت الفترة اللي المفروض استلم فيها التصميم وطافت ولا احد كلمني، فكلمتهم إني ابغا استرجع المبلغ بما إنكم مانفذتوا طلبي في الفترة الي حددتوها لي.

قالوا: احنا خلصنا التصميم بس باقي اللمسات الأخيرة.

يومين ووصلني التصميم، التصميم كان عبارة عن تجميع الأشياء الي ما ابغاها.

فرجعت وكلمتهم وإن كذا كذا ووضحت لهم (من محادثاتنا مسبقًا في الواتس اب).

وتم استلام تصميم الباكجنق بنجاح

ثانيًا: مرحلة التنفيذ

قلت لازم إني اتعامل مع مكان آخر بما إني شفت الجودة الموجودة عنهم

على الرغم من إن كان في بالي إن الي يصمم ينفذ عشان يتقن الألوان والفكرة نفسها لأنه المصمم نفسه بيشرف على التنفيذ.

وتعاملت مع مكان أكبر وذا جودة عالية، وكان التعامل في قمة الذوق بمعنى الكلمة، لدرجة إني ما كنت أزورهم في الفرع، هم يجوا لي للبيت ويروني العينات ونتناقش في كل التفاصيل وكان أكثر من زيارة، لين ما ضبطت العينات ووقعت على العينات ( واستلموها مني موقعة).

وكان نفس الموال دفعة مقدمة بنصف المبلغ – بعد تعميد العينة – والمتبقي مع الاستلام.

وقت التنفيذ كلموني تبغي العلب مقفلة؟ ( أنا مافهمت شنو معنى مقفلة!)

مقفلة يعني مصفطة؟ ولا مقفلة يعني مفتوحة بحيث استخدمها على طول وبكذا بتكون ماخذة مساحة كبيرة؟

كتبت اله شنو يعني مقفلة؟

قال: شوي واكلمك.

وماحد كلمني وأنا انشغلت وبعدها بكم يوم كلمته اتصال، ومارد.

شوي يوصلني فيديو على الواتس اب للمصنع وهو ممتلي بعلب الصور.

وضحت لهم إن أنا ما ابغاهم كذا مفتوحين، قالوا مانقدر نرجع نفكهم!! لوفكيناهم بيتلفوا؟

طيب، هذا غلط مين؟ مين الي يتحمل هذا الغلط؟

النهاية قالوا لي بنجيبهم لك وبعدين بنمر ناخذهم نصفطهم!!!

أنا ما ادري كيف وافقت، وجابوهم ولكم تتخيلوا عدد الكراتين الي وصلتني علب الصور لباكجين والأكياس لكل نوع 1000 حبة.

المكان عندي امتلى بشكل مو طبيعي في الاستيديو، الصالة وحتى غرف النوم، فوق الدواليب وبين الأثاث والفوضى عارمة عندي.

مر شهر ، شهرين، ثلاثة ماحد داق لي خبر

أربعة شهور وصلت حدي وقالوا خلاص بنمر ناخذهم بكرا !!!

يافرحتي ذيك الليلة قمت وما قعدت وسهرت طول الليل اجمع الكراتين من كل مكان عشان يستلموهم.

جا اليوم الموعود:

كلموني الظهر وللأسف أنا انشغلت في الدوام وماقدرت ارد عليهم.

خلصت دوامي اكلمهم، ماحد يرد.

رجعت من الدوام: اتصل لهم جايين!!

قالوا: كيف نجي انتهى دوامنا !!! العمال كلهم مشوا ومانقدر نجيبهم ولو بنجيبهم لازم ندفع لهم overtime، فانتي بتدفعي الـ overtime،

رفضت رفض قاطع إني ادفع أي مبلغ عشان اتحمل خطأ أحد يكفي التحمل الجسدي والنفسي الي مريت فيه، ومستحيل اقبل تأجيل أي يوم إضافي كفاية السهر الي سهرته والطاقة الي طلعتها عشان اجمعهم لهم، كيف اقدر ارجعهم؟ وبعدين اجمعهم عشان يستلموهم؟ ويمكن ينكبوني بعد؟

وأساسًا هم كانوا يعرفوا أوقات تواجدي، خصوصًا لما وصلوا لي الباكجنق ولما كانوا يجيبوا لي العينات، يكون بعد دوامي، فكيف يوم الي المفروض يجوا يستلموهم قالوا خلاص؟ ليش يوم التوصيل ماقالوا لي ادفع overtime؟

المهم بعد الأخذ والعطى معاهم لين وصلت للإدارة، والكل يقول لي احنا اجزنا خلاص، وقرابة الساعتين

قالوا خلاص بنمر ناخذهم ومروا واخذوا جزء وصفطوهم ورجعوهم واخذوا الجزء الثاني.

 

الخلاصة والتوصية من خلال تجربتي للباكجنق:

  • التعامل مع مؤسسات/شركات معتمدة وليس أشخاص.

  • الإجتماع مع المصمم قبل التعاقد.

  • التأكد من جميع نقاط العقد قبل الاعتماد.

  • عدم دفع كامل المبلغ كدفعة مقدمة.

  • الدفعة المقدمة تكون لا تتعدى 50% من كامل المبلغ.

  • دفع المبلغ المتبقي عند استلام العمل والتأكد إن الطلب تم تنفيذه حسب الاتفاق.

  • معرفة كم المساحة التي سيستغلها البكج للتخزين.

  • توفير المساحة الكافية للتخزين.

  • لا تستسلموا أبدًا أبدًا أبدًا.

  • وتأكدوا دائمًا إن كل مكان رح نواجه منهم مشاكل ومارح نوصل للي نبغاه بنسبة 100%، إن شاء الله رح نوصل لنسبة مرضية، ولكن خليكم مستعدين لأي عقبة أو أي مشكلة، وممكن حتى يغيروا كلامكم.

وشكرًا لقرائتكم موضوعي واتمنى إني افدتكم في حال كان لسى ما بدأتوا عمل الباكجنق